Die grave van Egmonde heer tot Baer etcetera stedehouder general van Hollande Zellandt ende Vrieslandt / Ende Florijs van Egmondt
zoon tot IJselsreijn heere tot Sinte Mertijnsdijck stadthouder slants van Gelre ende overste capiteijn gecommitteert over
Hollant ende Vrieslant Doen te weten dat wij omme Redenen ons daer toe voirende Inden name ende van wegen
ons alden genadigen heeren den Romsche Conijnck . Ende hertoge Karel onsen erfachtige heere Eertshertoge van Oistenrijc
Prince van Spaengen etcetera Geconsenteert hebben / den schout burgermeestere ende gerechte der stede van Culemburch over
ende Inden name vanden zelver stede mitgaders die gemeenen porteren burgers ende Inwoeneren van dien / dat zij
zullen mogen frequenteren converseren ende hueren coopmanscape doen bijnnen de voorschreven landen van Hollant Zellant ende
Vrieslant ende oic bijnnen den zelven landen te mogen copen ende halen alle alzulcken provande ende vitallie alst
hemluijden van noode Is te hebben tot hoeren nootnisse Behoudelijcke dat den voorseijde van Culemburch mitgaders
de coopers ende voerluijden vanden zelve goeden ende vitaille / zullen eedt doen over al In handen vanden officiers vanden
plecken daer de zelve goeden vitaille ende proevande gecoft zullen worden ende oic tot allen passaigen daert van
noode wesen zal. de zelve goeden ende provanden nergens te voeren te laeten noch te bruijcken [dan] alleenlijcken
bijnnen de voorschreven stede van Culemburch ende dat tot behouf ende sustentacie vanden voorseijde burgers poerters ende gemeenre
Inwoeneren van dien. / Zonder daer mede bij eenigen subtillen vonden oft practicke te vittallieren ofte spisenden
Gelderschen oft hueren adherenten vianden Rebellen ende quaet willende ons voorseijde alden genadichsten heeren noch
oick die van Utrecht ende die vanden gestichte Ontbieden daer omme ende bevelen allen bailluwen casteleijnen
amptmannen capiteijne scouten tollenaeren capiteijne Rutters ende knechten / ende ondersaten ons voorseijde alden
genadichen heeren ende elcx van hem ende hueren stedehouderen / dat zij die voorseijde burgers poerters ende Inwoenende der
voorschreven stede van Culemburch mitgaders de voerluijden mitten zelve goeden proevanden ende vitaille laeten
veijlich vaeren passeren ende hoerluijden copmanscap doen / Doer ende tot allen plecken steden ende paissagen te water ende
te landen opten eedt ende belofte voorschreven / zonder hunluijden te doen of te laeten geschien eenichhinder letsel ofte impedieren
tercontrarie des toirconde zoe hebben wij tsignet van Hollant dat men noch ter tijt useert ende gebruijct
hier op doen druijcken / ende bevolen Jan van Zevender greffier van Hollant / Dit over [over] ons te teijckenen
Twelck Ic Jan van Zevender ten bevelen als boven gedaen hebbe Gegeven Inden Hage opten xxvii en
dach van Maerte Int Jaer Ons Heeren duijsent vijfhondert ende zeven naden loop sHofs van Hollant
Wij mijnen heren den stadthouder Ende mijnen
heere van IJselsteijn stadthouder slants van Gelder
Ende overste capiteijn van Hollant ende Vrieslant
J van Sevender
Regest
1508 maart 27
Gegeven inden Hage... int jaer ons Heeren duijsent vijfhondert ende zeven nae loop sHofs van Hollant.
Graaf van Egmonde, stedehouder-generaal van Holland, Zeeland en Friesland, en
Florijs van Egmonde, stedehouder van Gelre, verklaren aan schout, burgermeesters en
gericht van de stad Culemborch en de burgers van Culemborg toestemming gegeven te
hebben om handel te drijven in Holland, Zeeland en Friesland en daar levensmiddelen
te kopen voor hun eigen behoeften.
In rode was restanten van het opgedrukte signet van Holland.
Klein gat rechts en linksonderaan in de vouwen. Ondertekend J.van Zevender.
afmetingen in mm: 378 x 232
[^van de Ven nr. 296, Hokke nr. 160]
