Wij Burghermeysteren Scholt Scepene ende gemeyne Rade der Stat van Culenborch doin kont allen luyden ende Bekennen
In desen apenen Brieve dat wij geboirt ende ontfangen hebben van onser Stat wegen bij will ende Consent ons lieffs Joncheren
Gerardtz here tot Culenborch etcetera van Herman Koevoit meyster Jan die Kock ende Peter Hermansoin als Potmeysters Inder tijt sesstien
alde schilt die wij vurseyt In onser Stat orbair gekijrt hebben Ende so hebben wij ter Begheerten Hermans Jans ende Peters als
potmeysters vurgemelt voir dese vurseyde Sommen geldz geloifft ende geloven van onser Stat wegen dat wij den potmeysteren Inder tijt
bynnen deser stede vurgemelt tot behoiff den armen Inden Pot Jairlicx ende alle Jair geven ende uytrecken sullen enen alden schilt
Jairlicker erffreynten vrijs geldz off payment dat In elker tijt der Betalingen dair guet voir Is / Welken enen alden schilt
tsiairs erfflicke Reynt vurscreven / Wij gelaifft hebben ende geloven van onser Stat wegen wall Te betalen ende uyt te reycken
den vurgemelte potmeysteren Inder tijt als nu op Onser Liever Vrouwen dach toe Lichtmisse naistcomende ende also voirt alle Jair dese
vurscreven Reynten opten selven Termijn te betalen ewelick ende erffelick gelijck vurscreven steet off bynnen vijrtien dagen dair na

ombegrepen myt alsulken vurwarden So wanneer die Stat van Culenborch desen vurseyde alden schilt tsiairs toe reynten vrijs
geldz den vurgemelte potmeysteren tot eniger tijt bewijst beleyt ende verwist op anderen sekeren erve ende guet dair sij wall ain gehalden
sijn Jairlicx den vurscreven alden schilt vry te heffen ende te boeren sonder enigerhande onkost dair aff te gelden off te kortten In
enigerwijs / So sall die Stat van Culenborch van deser vurseyde gelaifften loss ledich vry quijt ontslagen wesen ende so sall dese
Brieff alsdan doit mechtelois ende van gheenre weerden wesen / Alle dese vurseyde vurwarden ende punten hebben wij Burghermeysteren
Scholt Scepene ende gemeyne Rade der Stat van Culenborch vurgemelt geloifft ende geloven van onser Stat wegen vaste stede ende
onverbrekelich te halden / ende wall te voldoin / sonder all uytgenomen argelist Ende hebben deses toirkonde der wairheit onsen Stat
Segell ain desen Brieff gehangen / Ende wair wij Gerardt heer tot Culenborch etcetera willen dat dit vast ende stede gehalden warde
ende dit aldus bij onsen Consent ende toedoin geschiet Is gelijck vurscreven steet So hebben wij des toe meere zekerheit onse Segell
boven ain desen apenen brieff doin ende heiten hangen Gegeven Int Jair ons Heren dusent vijrhondert vijff ende tsesstich op
Sunte Valentijns dach

Regest
1465 februari 14
op Sunte Valentijns dach

Burgemeesters, schout, schepenen en raad van de stad Culemborg verklaren ontvangen te
 hebben, met toestemming van Jonker Gerardt heer tot Culenborch, van de potmeesters
Herman Koevoit, meyster Jan die Kock en Peter Hermansoin zestien oude schilden waarvoor
zij een jaarlijkse rente van één oude schild zullen uitbetalen.

De zegels van Gerardt heer van Culenborch en het stadszegel zijn verloren gegaan.

Afschrift in inv. nr. 1452 fol. 2 verso. Vlekken
afmetingen in mm: 267 x 124

[^van de Ven nr. 128, Hokke nr. 349]