Wy Burgermeisteren Scepenen ind Rait der Stat van Tiell / doin kont allen luyden dat in [................. die Stat van Culenborch ind wy Ind onser
twyer Stede Burgeren ind Dorpluyde eyn tyt lanck herwairt In den lande van [ Gelre vanden] Cleefschengrave zweerlick verkort
ende veronrecht worden sijn semtlick ende elc van ons besunder tolshalven [............] hercomen off gelegen sin boeven onse guede
alde rechten previlegien heercomen ind gewoenten / Dair wy mennichen guitlick ver[............] omme gedain hebn omme ons sulx In
genitlicheyt affgestalt ind verlaiten te moigen werden / Des oick niet en heeft [ons ter] gedyen / mer aldair soe langh soe
meer van daige to daige vorder Ind meer verkort ende besweert worden syn Alsoe dat onse twe Steden vurscreven doe kentlick
noit daer tho dringht ind port / omme by onsen rechten previlegien Ind guede [orden] heerkomen ind gewoenten wederomme te
moegen kommen ind onverkort te blyven andere weghe ende behulp inne te nemen bis tertyt toe ons Steden vurscreven sementlicklick

ende elck besunder sulke onrecht ind verkortonge als vurscreven steyt affgestalt ind verstaen moigen warden Soe bekennen wy
 Borgemeijstere Scepenen ind Raet der Stat van Thiell vurgemelt desen apenen brieve voir ons ind onsen nacomelingen dat wy 
Eersamen ind vursichtigen Burgermeisteren Scepenen ind Rait der Stat van Culenborch ind sy mit ons uijt gueden [e.... n] voir
bedachten synnen ind beraide, eendrachtlick averkomen verbonden ind geslaiten syn ind malkanderen vestlick gelaeft hebben
ind gelaven in gueden trouwen by onser eren geloeven ind gerechter eedtstat dat van elke vurgeruerde vercortonge ind mochten
als ons tween Steden vurscreven semptlick ind elcker van ons besonder eyn tyt lanck herwairt ainden Cleefschengrave aff [ennichen prijs]
geschiet syn / woe die gelegen off heerkomen moigen syn / ende allet des ons ind elc besunder dair aff van  yemande  wijr die
weer ainkomen mucht in ennigerwys / getrouwelicken mit malkanderen gelyckerehant sullen wederstain uyt helpen

ende verdedingen ende allet dair toe tdoin mit ofhalden tnemen ind nyemant uyten lande van Gelre hy ind wyr hij wae[r]
mit oeren scepenen ind guederen opwairt noch nederwairt voirt meer voirby to [Lente were]./ Ind die eyn den anderen dair [wier].nae
alle onser machten geredich behulpelick ind bystendich te wesen myt raide int mit daide sunder ennigerleijc indracht offt on=
schult dair Inne [vri]e te nemen Ind die eyn Stat van ons tween Steden vurscreven buyten den anderen van ons niet aff te [lencen] noch
sich dair van te slichten off te scheyden in ennigerleyewys bis ter tyt toe die saick vurscreven by wille weten ind consent onser twyer
Stede vurscreven semptlick geboirlick ind eendrechtlick affgestalt int uytgedraigen sy Ind wy semptlick ind elc besunder van ons wederom
tot onser rechten previlegien ende guede alde heerkomen ind gewoenten vurscreven kommen ende onverkort blyven moegen als vurgeruert
steijt sunder alle argelist, In oirkonde der wairheyt Soe hebn wy Burgermeisteren Scepenen ind Rait der Stat van Tiell vurscreven onser
Stat Secreet segel by onser gerechter wetenheyt ain desen apenen brieve doin hangen  Gegeven int Jair ons Heren duysent vijff
hondert ind sess opten Heyligen Pynxteravont.

Regest
1506 mei 30
opten Heijligen Pinxteravont

Burgemeesters, schepenen en raad van de stad Tiel verklaren een overeenkomst te
zijn aangegaan met de stad Culemborg om de inbreuken op hun tolprivileges, gepleegd in
het land van de Graaf van Kleef, te bestrijden.

Het secreetzegel van de stad Tiel is verloren gegaan.

Vlekken, schimmel en gaten op de vouwen. In het regest staat Cleve i.p.v. Kleef, in de
oorkonde staat "Cleefschengrave".
afmetingen in mm: 286 x 176

[^Van de Ven nr. 955, Hokke nr. 161]