Wij Willem Zurmont Johan van Kijck ende Wouter die Brune scepene tot Culenborch doin kond allen luden ende tugen mit desen tegenwoirdigen
brieve dat voir ons gecomen sijn Heinric vanden Rijn ende Alijt sijn echte wijf mit hem ende hebben bekent ende mit hoiren vrijen wil over ghe=
gheven der kerken van Sente Barbaren binnen der stat van Culenborch erfliken ende ten ewigen dagen vrij ende ombekommert te hebben ende te behouden
enen auden Vrancrijcscen scilt siaers of payment dair voir als onse lieve here van Culenborch in elken tiden van sinen pacht doiter nemen
te heffen ende te bueren uut hoiren huse ende hofstat tune ende tijmmer egge ende eijnde also als dat gelegen is tussten Gijsbert Hermans zoins erfnamen
aen die een side ende Evert Loif mit sinen wagenwech aen die ander side tebetalen alle Jair uten voirgeruerde huse ende hofstede op Sente Martijns dach
inden wijnter Mit sulken vorwairden datmen mitter selver erfrenten voirscreven Jairlicx olije mede copen zal te barnen ende dat heilige cruus inder
kerken voirgeruert mede te verlichten Aldinck sonder argelist Ende want dit aldus voir ons scepene voirscreven gesciet ende volvaren is Soe hebben wij
onse zegelen aen desen brief gehangen tot eenre rechter orkonde Ghegeven Int Jair ons Heren dusent vierhondert neghen ende dertich
op Sente Victors dach un[um]
Regest
1439 oktober 10
Sente Victors dach
Willem Zurmont, Johan van Kijck en Wouter die Brune, schepenen te Culemborg,
oorkonden dat Heinric van den Rijn en Alijt, zijn vrouw, overgedragen hebben aan de st.
Barbarakerk te Culemborg een rente van een oud schild per jaar, afkomstig uit een huis
te Culemborg, gelegen tussen de erfgenamen van Gijsbert Hermansz en Evert Loif "mit
sinen wagenwech".
De zegels van de oorkonders zijn verloren gegaan.
afmetingen in mm: 227 x 81
[^van de Ven nr. 92, Hokke nr. 120]