Ic Johan van Rossem heere Johanszoen heere tot Zoelen doe kont ende bekenne myt desen openen brieve dat voir my ende voir myne mannen van leen hier na bescreven
gecomen Is Willem Janszoen de Cuper droich op ende gaff over aen mynen handen mit synen vryen wille, die rechte halleff sceydinge van negen mergen lants
geheiten die Koecampen gelegen In Culenborcherbroick In die Avontuer dair aen die eenzijde naest Is gelant die Vreedstroschestege ende aen dander zyde naist
is gelant die Joncher van Culenborch streckende mitten eynen eynde aen Bloxweteringe ende mitten aenderen eynde aen die Bredestege Soe hem die by dode Geryt die Cupers
syns ooms aengeerft ende bestorven waeren Ende hy verteech dair na voirt op mit hand halm ende monde ende mit allen rechte sodat vonnysse myne manne wysden
dat hy rechte verrichtenisse hedde gedaen Ende ic dit vurscreven leen mocht laten ende keren dair ic wolde, doe dit was geschiet doe verleyde ic ende beleende dese
vurscreven hallefscheydinge ende leen voir die selve manne Hubert Janssoen die Cuper synen brueder The halden van my ende myne nacomelingen Hubert vurscreven ende
syn nacomelingen then Zutphenschen recht ende tot enen onversterflicken erfflene Te verheergewaden alst myt recht verschynt mit een paer witterhantschoen

mit sulcker vorwaerden dat syn rechte leenvolliger dair dit vurscreven leen guet na synre doot mit recht opkomen sal syn onder bruederen ende zusteren te weten
mit namen Gheryt Willem Wouter Peter Gheryt Griet Mary Jan Baet Alyt ende Neel Huberts vurscreven kynderen ellix van hem dair af uytreyken ende geven tyen
alde schilde Te betalen bynnen den naysten Jair na dattet hem aengekomen verschenen ende oick die tocht verstorven wair Voirt so heb ick ter begheerten
Huberts vurscreven Ermgart synre huysvrouwen hoir alinge lyftocht bekant aen dit vurscreven leenguet te gebruijken hoir leven lanck In tochten recht Behel=
telick my ende yegelick syns rechts Ende oick Hubert vurscreven syn leven lanck synen vryen wille dair mede te doen Dair dit geschiede hebben aen ende over ghe=
weest myn beleende mannen Gheryt Coppier Ghysbert van Dichteren ende Gheryt Beerntsoen mit meer gueder mannen Oirkonde myns segels hier aengehangen
Gegeven Int Jair ons Heren dusent vierhondert vyf ende soventich op Sinte Johans dach Baptist to mydsomer.

Regest
1475 juni 24
op Sinte Johans dach Baptist to mydsomer

Johan van Rossem heer Johanszoon, heer tot Zoelen, verklaart beleend te hebben Hubert
Jansz de Cuper met de helft van 9 morgen land  genaamd Koecampen, gelegen in
Culenborcherbroick in die Avontuer, na opdracht door Willem Jansz de Cuper.

Het zegel van de oorkonde is verloren gegaan.

Aanwezig bij de belening zijn Gheryt Coppier, Ghysbert van Dichteren en Gheryt Beerntsz.
afmetingen in mm: 293 x 100

[^van de Ven nr. 161, Hokke nr. 106]