Desen Rentbrief staende up twe kynderen zijn geheel afgestorven  Dair omme
dess Rentbrief gecasseereert.

Wy Hubert van Culenborch bastaert Henrick Zuermont ende Wyllem Aerntssoon als Gasthuysmeisteren nu Inder tyt des Heligen Geests ende sgasthuys bynnen Culenborch
Doen condt ende bekennen myt desen brieve voir ons ende voir die ghene die na ons gasthuysmeisteren vorscreven Inder tyt wesen sellen. Dat wy omme ghemeenen orbar
onses gasthuyses vorscreven by wyll ende consent des Edelen Joncher Everwijns Oem tot Culenborch als een Stedehouder van wegen des Edelen vermogende ons liefs
Joncheren, Joncher Jaspers Heren tot Culenborch then Weerde tot Borssellen tot Hoigstraten etcetera ende by rade ende guetduncken van ons gemeynen gerichtz, van wegen onses
gasthuys vorscreven, ende op onse gasthuys vorscreven, verkofft hebben den Eerbaeren Her Johan Moer, Deken der kercken van Sinte Barbaeren tot Culenborch, ende
Kathryn Gysbert Duvels dochter synre meget off den langsten levende van hem beiden. Tyen Rynsche gulden current, als twyntich currente stuvers voir den
gulden gerekent Jaerliker lyffrenten tot hoer beider lyve off also lange hoer ennich In levendigen lyve Is, als voir een zeker somme geltz die sy ons gasthuysmeisteren
vorscreven witlick ende waill betailt hebben den lesten pennynck mytten yrsten, ende die wy voirt In orbar ende tymmeringe des gasthuys huysyngen gekiert ende geleit hebben

by rade ende goetduncken ons liefs Joncheren ende sgerichtz vorscreven, hyeromme So geloven wy gasthuysmeisteren vorscreven nu Inder tyt voir ons ende onsen nacomelingen
gasthuysmeisteren Inder tyt wesen sellen, In goeden trouwen Her Johan Moer ende Kathrynen vorscreven, also lange sy beide leven off hoer ennich In levendigen lyve Is,
dese vorscreven Tyen Ryns gulden current sJaers lyffrenten, te vryen ende te waeren, als eygen vry goet tegens allen Heren ende tegens enen yegeliken mensche, ende waill
te betalen ende te leveren In hoer vry zeker onbekummerde behout. Die een helffte op Alre Helligen dach naistcomende, ende dander helfte op Sinte Philips ende Jacobs 
dach Apostolorum daer naistvolgende off bynnen vyertiendagen na elcken termyn vorscreven onbegrepen.  Ende so voirt Jaerlix dese lijffrenten vorscreven te betalen also lange
Her Johan Moer ende Kathryn vorscreven leven, off hoer ennich In levendigen lyve is, ende nyet langer  Ende waert saick dat dese betalinge op ennigen termyn vorscreven
nyet en geschieden als voirscreven staet  So mogen Her Jan Moer ende Kathryn vorscreven,  off houder disbriefs by hoeren wyll, offte hoer gewaerde bode die verschenen
onbetaelde lijffrent vorscreven doen panden, uut ende aen alle goetz rede ende onrede, rurende ende onrurende alst gasthuys voirscreven nu hefft ende namails krigen mach

so wairt oick gelegen waer, ende mytten gepanden goede voirt the mogen vaeren ende ter stont vercopen, offt myt allen recht, uutgeslegen ende verwonnen waer
Ende In dien sy mytter pandingen vorscreven tot gheenre betalingen gecomen en kunnen, alsdan so mogen sy offt hoer gewaerde bode, off houder disbriefs vorscreven, onse
Borgeren ende Ingesetenen, so waer offte In wat heren landen off Steden sy die bevynden, Daer voir besetten bekummeren ende ophouden hoer lijff ende goet, ende mytten
recht daer op voirderen bytz.tot vulcomenre betalingen aller affterstediger onbetaelder lijffrenten vorscreven ende mede alles gebrecks hynders cost ende schade, sy
daerom hedden leden kregen off deden, sonder ons ende onsen borgeren ende Ingesetenen vorscreven, hyer tegens yet te mogen behelpen, te beschudden, te doen te laten
geschien, offte te verweren myt ennigen previlegien statuten vryheiden van marckten off anderen geleide poerteryen exempcien, offte myt ennigerhande behulp geestliker
off werltliker recht, off anders ennychsyns In ennigerwys, der wy nu alsdan ende alsdan als nu, gensliker ende all, voir ons ende alle onsen borgeren ende Ingesetenen

vorscreven, hyerop vertegen ende gerenuncyert hebben Renuncieren ende vertyen. Sonder argelist. Ende Her Jan Moer vorscreven sall heffer ende boerre wezen, der lijffrenten vorscreven
also lange als hy leefft, ende na synre doit, so sall Kathryn vorscreven dan voirtan dese lijffrenten selver heffen ende boeren also lange sy leefft ende nyet langer /
Voirt syn voirwarden waert saick dat dese tegenwoirdigen brieff, gestolen verbarnt ontvremdt, offte In enniger manieren verargert worde So geloven wy
gasthuysmeisteren nu Inder tyt voir ons, ende voir onsen nacomelingen gasthuysmeisteren Inder tyt wesen sellen, dat wy alsdan Her Johan Moer ende Kathryn vorscreven
enen goeden gantzen vasten brief wederom In die Stede des verlorens offte verargerden briefs vorscreven sellen geven van desen lyffrenten vorscreven, besegelt myt Segelen
der gasthuysmeisteren Inder tyt, ende ten vorsten myt Segelen ons liefs Joncheren ende synre Stat Culenborch, nader Copien autentyck van desen brieve bynnen die
naeste viertiendage, na dat die gasthuysmeisteren Inder tyt des vermaent werden, van Her Jan Moer ende Kathrynen vorscreven, offte van hoers gewaerden bode. Alle
dese vorscreven punten ende elck punt bisonder hebben wy gasthuysmeisteren vorscreven nu Inder tyt voir ons, ende onsen nacomelingen gasthuysmeisteren Inder tyt wezen sellen, van

wegen ons gasthuys vorscreven, by wyll ende consent ons liefs Joncheren Stedehouders, ende sgerichtz vorscreven , geloefft ende geloven, In goeden trouwen, waer vast stede ende
onverbrekeliken te houden, te doen, te doen doen ende te laten geschien. Ende allet Sonder argelist Dis torconde ende kennysse der waerheit So hebben wy
Hubert van Culenborch bastaert ende Henrick Zuermont als gasthuysmeisteren nu Inder tyt voir ons ende onsen nacomelingen gasthuysmeisteren vorscreven, ende oick mede voir
Wyllem Aertssoon onsen medegasthuysmeister vorscreven, om synre beden wyll omgebreck syns Segels teser tyt, onse Segelen aen desen bryeff gehangen Ende want
wy Everwijn Oem tot Culenborch als een Stedehouder ons Neven voirscreven, ende wy Schout Borgermeisteren Scepenen ende Rait der Stat Culenborch, dit mede
beliefft, geconsentiert, ende overgegeven hebben, voir ons, onsen borgeren ende Ingesetenen, als voirscreven is. So hebben wy Everwijn Oem tot Culenborch onsen Segell
ende wy Schout Borgermeisteren Scepenen ende Rait vorscreven onsen Stat Segell boven aen desen brieff doen hangen, Int Jaer ons Heren dusent vyerhondert
Soeven ende tachtentich opten lesten dach In Apryll.

Regest
1487 april 30
opten lesten dach in Apryll

Hubert van Culenborch, bastaard, Herrick Zuermont en Wyllem Aerntssoon,
gasthuismeesters te Culemborg, oorkonden dat zij met toestemming van Jonket Everwijn Oem
tot Culenborch, stadhouder van Jonker Jasper Heer tot Culenborch, verkocht
hebben aan Heer Johan Moer, deken van de St. Barbarakerk, en Kathryn Gysbert Duvelsdr,
"synre meget", een lijfrente van tien Rijnse gulden per jaar.

In rode was een fragment van het zegel van de stadhouder en in groene was het
stadszegel en de zwaar geschonden zegels van de gasthuismeesters.
Gecancelleerd. Kleine bruine vlekjes links-midden.
afmetingen in mm: 351 x 291.

[^Van de Ven, regest nr 216, Hokke nr. 189]