Wij Geryt van Culemborch Hubertzoen ende Herberen Symonszoen Scepenen tot Culemborch doen condt enen yegelicken dat op huyden data
van desen voir ons In persone gecomen zyn Jacob Corneliszoen mit Cornelia zyn echte huysfraue ende hebben geloeft Ghisbert van
Dichteren ende Jan Vermuyr potmeysters Inder tyt binnen Culemborg tot behoef der Potten ende gerechten huysarmen een mud weyts
Jaerlicx euwich ende erffelicke opten Heyligen Paesdach Te betalen uuyt die rechte helft vanden huyse ende erve dat Water Otten
zaliger toe te behoeren plach staende Inde Nyestadt tusschen Geryt Jan Symonszoen aen deen zyde ende Jan Hubertzoen aen dander zyde waer
aff die helft naest Geryt Jan Symonszoen voirscreven Jacob ende Cornelia voirscreven ende die wederhelft naest Jan Hubertzoen Cornelis Isbrantzoen
toegehoeren is waer aff nu Paischen Anno xvc. een ende veertich dat yerste mud weyts verschinen sal Ende soe voirt Jaerlicx
euwelick ende erffelick geduerende allet nae vermoegens dat testament ende uuytersten wille van Wauter Ottenszoen voirscreven
Geschieden dese betalinge Jaerlicx nyet ten daghe voirscreven soe mach men dat uuytpanden aenden huyse ende erve voirscreven als men
vry erfrente gewoentlick is te panden Inden scependom van Culemborch Doch mit toegedaen voirwaerden dat die potmeysters
ofte anderen In elcker tyt potmeysters wesende gehouden sullen zyn altyt op Woensdach nae beloken Paesdach over die
siele van Wauter Otten voirscreven tvoirgemelte mud weyts In rechter aelmoesen te spynden ende te deylen den gerechtigen armen
dairt meest van noede ende bestaet sal wesen sonder argelist Des toirkonde hebben wij scepenen voirscreven elcx onsen segel
aen desen brief gehangen Gegeven Inden Jaer ons Heren duysent vyfhondert een ende veertich opten negenthienden dach
In Februario
Regest
1541 februari 19
Geryt van Culemborch Hubertzoen en Herberen Symonszoen, schepenen te Culemborg,
oorkonden dat Jacob Corneliszoen en Cornelia zijn vrouw toegezegd hebben aan Gisbert van
Dichteren en Jan Vermuyr, pothmeesters te Culemborg, een mud "weyts" per jaar
afkomstig uit de helft van het huis van Wauter Otten zaliger.
De zegles van de oorkonders zijn verloren gegaan.
Afschrift in inv. nr. 1452 fol. 42 verso. Vlekken en beschadiging op de linkervouw.
afmetingen in mm: 297 x 110
[^van de Ven nr. 424, Hokke nr. 368]
