blz. 1

Item ipsa die Dominica Judica [*] Civiloquium habitum
est coram Theodorico de Stralen Judice Gerardo [de Eck]
et Johan de Avezaet burgimagistris / Arnoldo de
Avezaet Gerardo vanden Steenhuse Wilhelmo Hase
Gerardo de Aefferden Heinrico Hase Heymerico de
Drueten et Nycolao Wolboker scabinis / Hebben die
gemeyn burgers eendrechtelicken geset ende gekaren
onser stat rentmeisters te wesen Jan die Man
Janssoin ende Herman van Ewick twe Jair lanck van
desen dage voirscreven ende sullen der stat gude bewaeren
soe dat van ouds gewoentlichen is /
[^* 19 maart 1458]

Item ten selven mael wart over gegeven datmen
affter desen dach mit desen cleynen geltken in den
smalen heerlicheyden gemunt ende geslagen ende
heghmunten heyten niet vercopen noch mede kopen
en sal / noch om Gods will geven noch offeren en sal
noch bynnen onsen gerichten niet ganckafftich
en sullen wesen ende niet gelden en sullen op een
peen van j alder Vranckrijcksen scilt halff den here ende halff
der stat uyt te peynden.

Item wart overgegeven datmen nu voirt ain mit enen
helen loet waken sall alle nacht / ende dair soe
voel manne aff te nemen / datmen sdages voir
elke poirt setten sal iiii man geduerende also
langh dat den rade dunct dats node is / elc
man ter wake te comen mit sinen panser yseren hoet
ende i weer in die hant ende desgelicken sdaiges
die porten te hueden / ende were yemant die geen
harnasch en hedde noch niet dair op geset en
were / die salt lenen also dat hijt heb / Voirt sall
een ygelich vanden rade mit sijns selvs live waken
buten noitsaicken ende hij bij huse were / ende des
gelicken sal een ygelick borger oick selve waken
buten noitsaken / ende weert dat hij ommer niet
waken en mocht van siecten off anders / soe sal hij
enen gueden harden man dair den rade ain ge=
nuecht in sijn stat moigen setten / voir oen te waken
ende anders niet / ende alle dese punten te vollhalden
op die broken die op die waick stain / enen yge=
licken die se verbuert vain stonden ain uyt the
peynden des men oick v nyemant verlaten en sall

Voirt soe en salmen nyemant affter der tijt dat
die porten gesloten sijn uyt noch in laten / dan
bij enen borgermeister off twe borgermeisteren off tween
scepenen off bij tween vanden rade /

Voirt en sal nyemant geen verssche botter veyle
hebben dan mit maten als dat gewoentlich is / van
ouds / ende die maten sullen wegen i libra ende ii loet
op een peen van iii libra / als i libra den richter / dat
ander den borgermeisteren ende dat dorde den kuer=
meisteren ende uyt te peynden etcetera