Wy Arnolt vander genaden Gaitz Hertoge van Gelre ende van Gulich ende Greve van Zutphen / Doin kont alsoe onse getrouwe Stat van Tiele /
ons nu opgedain ende guitlich te kennen gegeven heefft / woe onder onsen  Burgeren ende Ingesetenen aldair vast irringe ende gebreecken vallen / van
verlegenen scholtbrieven / ende die lude voir dat gericht te dagen  / ons oitmoedelich biddende dair op te willen versien gelyck des tot nut ende orber noit
geboeren mach / Soe bekennen wij hertoge vurscreven voir ons / onse erven / ende nakomelingen / dat wij te vorder omme lieffden / trouwen / ende gelouven wille /
der selver onser Stat van Tiell soe sij doch nu verbrant sijn / beliefft / verleent / ende gegeven hebn / believen verleenen / ende geven mit desen brieve dat
men nyement bynnen der selver onser Stat / ende gericht van Tiell ende Sandwijck / omme eynre saken ende toespraiken wille / vorder / off men
dan eens en sall dorven gedagen / voir dat gericht / ende datmen dan dair mede sall moigen doin ende voirtvaeren nader Stat rechten / ende gelijck
off hij meir ende vorder gedaigt were / Voirt alle Scholtbrieve gegeven bynnen der selver onser Stat ende gericht vurscreven / dair die taildaghe aff
omme ende nyet[^boven de zin geschreven] gemaent en weren / salmen noch manen bynnen desen naisten drije Jaeren na data dis brieffs nae eenanderen volgende / Ende brieve dair

die taildage noch nyet aff omme en weren / die nu gegeven sijn / off ommermeer gegeve soelen werden / ten ewigen daigen toe / salmen oick altijt
moeten manen ende vorderen bynnen den naisten drye Jaeren na den taildage der selver brieve / Ende off des nyet en geschege / soe solden alle
die brieve dair aff voirgeruert is / sleper doit machteloiss ende van egeenre werden sijn / Uitgescheiden van onmondigen kijnderen ende luden
die buten lendich weren /ende nyement hoere saken bevalen ende gemechticht hedden / als  recht were die soelen hoere brieve oick manen die onmondigen
bynnen den naisten drije Jaeren dat sij mondich weren / ende die uitlendigen bynnen den naisten drije Jaeren / dat sij weder bynnen lantz komen
weren / Ende alsdan oick voirt stain in maten vurscreven / Ende dit allet sonder argelist ende ongeveerlich / Orkonde dis hebn wy hertoge vurscreven
onsen Siegell ain desen brieff doin ende heiten hangen / In den Jaere onss heren dusent vierhondert drijendetSestich des vrydagen na
sente Margrieten dach Virginis /
 

Per dominum ducem praesentibus de Consilio Johanne de Rossem reddituario
Alphardo Schymelpennick Reddituario supremo (terrarum) Gelren  

REGEST
15 juli 1463
Arnolt, hertog van Gelre, geeft bepalingen, welke in Tiel en Zandwijk zullen gelden ten opzichte van verjaarde schuldbrieven. In den jaere onss Heren dusent vierhondert dry ende tsestich des Vrijdages na Sente Margrieten dach virginis. Met het zegel van de hertog in rode was. Met een transfix van 24 februari 1465.
Gedrukt: Van Veen, bladzijde 12.