Wy Arnolt byder genaden Gods hertoge van Gelre ende van Gulich Ende Greve van Zutphen Doen kondt allen luden myt dessen apenen brieve Ende bekennen dat Wy bii raede ende goetduncken onser Raede ende
vrunde Ende om sunderlinge gunst ende trauwen dienst dien onss ende onsen alderen onse goede lude ende getrauwe die Borgermeysters Scepen Raede ende Borgeren Ingeseten ende onderseten onser Stat ende Scependoms van Tiell ende van
Zandwiick ende horen voervaderen ducke gedaen hebben Ende die sy ende hoer Erffgenamen ende nacomelingen onss ende onsen Erven ende nacomelingen noch menichwerve doen sullen Allen den selven onsen goeden luden die Borgher
meysters Scepen ende Raede Borger Ingeseten ende onderseten onser Stat ende Scependoms van Tyell ende van Zandwiick die nu ter tiit siin Ende hoerre alre Erve ende nacomelingen die naemaels inden voerscreven onse Stat ende
Schependom van Tiell ende van Zandwiick wonen sullen Gegeven hebben ende geven myt dessen tegenwoerdigen brieff erffelic ewelic ende ummermeer voer onss onse Erven ende nacomelingen alsulck recht te hebben ende te
behalden als in dessen brieff bescreven steet ende hiernae volcht Dat is te weten Inden yersten / dat nae datum dess briefs / voertaen nyemant hii sy man off vrauwen persoene / die diicken liggende heeft inden gerichten van Tyel off
van Zandwiick siin diicken en sall laten liggen verlaren die nyet doerbrakich off wadich worden en were / Dede dat daer en theynden yemant / die mensch sal daer aen gebroeckt hebben siin liif ende siin guedt / tot onser
behoeff / ende sal dan ter stont ontborgert siin tot Tiel ende tot Zandwiick vurscreven / Ende daer voert alsdan nummermere Borger te mogen werden / Weert oeck sake dat inden voerscreven gerichten voertmeer enige diicken doerbraken off
wadich worden / So en sal die mensch die die diicken siin weeren ende toebehoren die doerbraken off wadige diicken / nyet laten liggen ongemaect voir verlaren diicken / byder voergemelte broken ende peenen / van liiff ende guedt tot
onser behoefff / ende ontborgert te siin ten ewigen dagen toe als voerscreven is / Ten were sake dat die mensch / die die diicken siin weeren / alsoe arme weer / dat hy van gerechter armoeden / dess diicke geen macht weder en hed
te doen maken / So sall die selve mensch dan sich dess affdoen voer onsen Richter ende tween Scepenen tot Tiell off tot Zandwiick myt synen eden vleysscelick aen den heyligen te sweeren / myt gestaefden eden / dat hii van
kenlicker noot ende van gerechter armoeden geen macht en heeft den doerbraken / off wadige diicken weder te doen maken na sheemraeds koere Ende dien eedt sall onse Richter apenbaerlic nemen Ende so mach die mensch
dan sonder broke aen onss dien diick laten liggen verlaren / ende mach borger blijven off warden / Ende dat in sulken voirwarden / dat hii vanden verlaren diick noch van sinen toebehoer geenrehande guedt / afftrecken /
ophauwen / breken noch bloeten en sal cleyn noch groot luttel noch vele by der selver broeken van liif ende guedt / ende ontborgert te siin als vurscreven is Ende alle gueds rede ende onrede dat die mensch heeft liggen Inden vurgemelte
gerichten die die verlaren diicken laetste siin weeren dat sal nochtant voer ende ten yersten wesen ende blijven inden voergemelte verlaren diicken ende in siinen onraet sonder yemants wederseggen / Weert oeck sake dat tot eniger
tijt inden voergemelte gerichten enige diicken verlaren bleven liggen nae datum dess briefs So en sullen die seven wanneer men die verlaren diicken myt horen onraet geven ende heeren sullen / geenr macht hebben van weerden Inden
rechten die verlaren diicken te heren / off den onraet daer aff te bewysen op enigen huyse off hoffsteden tymer off thiins / gelegen inden voergemelte gerichten van Tyel off van Zandwiick In geenrewiis / uytgesceyden ende be=
heltelicken So wat huys hoffsteden / tymer off thiins dat op datum dess briefs beboedelt is myt enigen diicken tot Tyell off tSandwiick gelegen / off daer mede beboedelt is geweest binnen thyen jaren laetste voirleden voer datum
dess briefs ten alre langsten ende nyet langher dat dan oeck also bewiisselic Is datmen dat bewiisen mach myt goeder waerre konden / oft sake were dat alsulke diicken verlaren bleven liggen ende geheert worden myt horen onraet als
recht is dat dan die huyse / hoffsteden / tymer off thiins die alsoe daer mede beboedelt weeren als voerscreven is daer nyet vry aff en sullen wesen Anders willen wy dat voertaen alle huyse / hofsteden / tymer ende thiins gelegen
In onsen voergemelte gerichten van Tyell ende van Zandwiick ten ewigen dagen toe vry sullen wesen ende bliiven van allen diicken ende van allen onraet van diicken uutgesceyden als voerscreven is sonder yemants weederseggen Oeck
willen wy dat onse Richter tot Tyell ende tot Zandwiick voertaen tot genen gerichte sitten en sall noch oeck nyet richten en sall tot Tyel noch tot Zandwiick dan alleen bii clymender sonnen voer den middage tusschen den mid=
dage ende twee uren voer den myddage sonder argeliste / uutgesceyden ende behaltelicken die eynteftige dage te blijven staen in horen alden gewoenten ende heerkamen als dat van alds gewoenlic is geweest Mede willen wy
oft sake were / dat yemant gepeyndt worde tot Tyell off tot Zandwiick van wat saken die peyndinge oeck wesen mocht dat die mensch die alsoe gepeyndt worde / siin pande sal mogen weeren binnen den yersten drien dagen
na der voerscreven peyndinge, off hy will / eer men hem enigen scade sal mogen doen Inden rechten mytten voerscreven peyndingen Ende off die mensch binnen den voerscreven drien dagen siin pande sall willen weeren dat mach hy doen aender
gezworen bode daer hy mede gepeynt were / in off hii den gezworen bode nyet viinden en konde / off krigen / dat hii dan siin pande weren mach aen onsen gezworen Richter / off en kond hy den Richter voerscreven nyet krigen noch
vijnden dat hij dan siin pandweringe doen mach aen den Borgermeysteren / off voer tween Scepenen tot Tyel off tot Zandwiick / ende staen dan van diere saken daer hy om gepeyndt were ten rechten den genen die hen had doen
peynden Int yerste weeckgedinge daer nae volgende / recht ende vonniss der scepen daer aff te verwachten na den gewoenten des weeckgedings ende anders van diere voerscreven peyndingen vorder genen scade te krigen noch te
lyden. Ende behalteliken oeck hier en theynden onser Stat ende ondersaten van Tiell ende van Zandwiick vurscreven all hoer voerbrieve kaerten ende privilegien ende haer goede alde gewoenten ende heerkamen die sy van onss ende onsen voerva
deren hebben in hoerre volcomenre machten te blijven Voert so willen wy ende bevelen eerstelic onsen Amptman ende Richter van Nederbetue van Tyell ende van Zandwiick die nu inder tiit siin / off naemaels wesen sullen then
heyligen te zweeren op desen brieff alle dese voerscreven punten ende rechten te halden die in desen brieff bescreven staen / alsoe als sy zweeren opten brieven kaerten ende privilegien die onse voerscreven Stat ende Scependomme van Tiel
ende van Zandwiick hebben van onse voervaderen gueder gedechten ende van onss / Alle desse vurscreven punten ende vurwarden hebben Wy Hertoge voerscreven voer onss ende voer onsen Erven ende nacomelingen gelaift ende gelave In
all sulker maten als Wy ende onse voervaders selliger gedachten gelaift hebben Inde brieven ende privilegien die onse Stat ende Scependom van Tyell ende van Zandwiick voerscreven van onss hebben Erffelic ewelic ende ummer=
meer te halden ende te doen halden ende nyet te breken in enigerwiis uutgenomen all argelist / In orkonden dess / hebben wy onsen segell aen desen apenen brieff doen hangen Gegeven in onser Stat Tyell Inden Jaer onss
heren dusent vierhondert Soevenendeveertich op Sunte Barbaren Avont Virginis
Per dominum ducem praesentibus De Consilio domino Heynrico filio de Meirr domino de Werde / milite . Johanne de
Rossem filio domini Johannem de Rossem / Arnoldo necnon Walramo de Haeften fratibus / Francone Pieck / et
Udone Talholtz Reddituario suprimo terrarum Gelren
REGEST
3 december 1447
Arnolt, hertog van Gelre, geeft aan die van Tiell en Zandwijck voorrechten over dijken en rechtspraak. Gegeven in onser stat Tyell in den jaer onss Heren dusent vierhondert soeven ende veertich op Sunte Barbaren avont virginis. Met het zegel van de hertog in rode was. Met een transfix van 24 februari 1465.
NB:Gedrukt: Groot Gelders Placaet-Boeck, appendix I, kolom 58 en Van Veen, bladzijde 8. Vermeld: Gedenkw. IV, nummer 239
Betreft: Dijkrecht en pandrecht voor Tiel en Zandwijk ; rechtspraak bij klimmende zon
